«Ծիրանի» անսամբլ, Գործ 1
Կատարյալ գեղեցկություն ստանալու համար անհրաժեշտ է, մաքրելով խանգարող տարրերը, փոքր-ինչ ընդգծել բնական գեղեցիկը… Ասածն ավելի քան տեղին է, երբ խոսքը վերաբերվում է հայ մշակույթին, որը հայ հող ու ջրից, լեռներից սերված, քարքարոտ հողում ծաղկած ծիրանենու է նման: Նույնապես մեր աշուղների՝ Նաղաշ Հովնաթանի, Սայաթ-Նովայի, Ջիվանու և այլոց երգերից առնում ենք մեր բերքերի քաղցրությունը, Կոմիտասի երգերից համն ենք առնում մեր թոնրի հացի ու կարմիր գինու, մեր միջնադարյան տաղերից ու հոգևոր երգերից հագուրդ ենք ստանում ինչպես մեր լեռների ստորոտի աղբյուրներից:
Այս ձայնասկավառակում «Ծիրանի» անսամբլը փորձել է առավելապես բնական մատուցել հայ երաժշտության տարբեր շերտերից վերցրած գոհարները, իսկ կոմպոզիտոր Գրիգոր Առաքելյանի ձեռագիրն ամբողջացրել է մեր երաժշտության տարբեր գունային գամմաները՝ ընկալելի դարձնելով այն մերօրյա հանդիսատեսին:
Սովորել հայոց պատմությունը՝ սա է հայի արվեստը հասկանալու և սովորելու միակ ուղին:
Հիրավի, թե՛ երաժշտությունը, թե՛ գրականությունը նման են մի մեծ խառնարանի, որտեղ ձուլվել են հազարամյակների պատմությունը, մարդկային հասարակության տարբեր շերտերը՝ իրենց կենսակերպով ու մտածողությամբ:
Գեղջկական երգերը, միջնադարյան տաղերը, գուսանական, աշուղական երաժշտությունը՝ հայ երաժտություն անվամբ շղթայի տարբեր մասնիկներն են, որի ամեն մի օղակն իր ժամանակահատվածն ու տարածաշրջանն ունի, իր ուրույն պատմությունը:
Ծիրանի անսամբլի նպատակն է ներկայացնել հայ երաժշտությունն իր տարբեր շերտերով, այդ ու հանդերձ հասանելի լինելով մերօրյա ունկնդրին՝ բավարարելով թե՛ խստապահանջ երաժիշտի, թե՛ պատահական ունկնդրի լսելիքը։
Ծիրանի անսամբլը ստեղծվել է 2012 թվականին: Խումբն ի սկզբանե գործիքային հնգյակ էր՝ դուդուկ, շվի, թառ, ուդ, դհոլ գործիքների կազմով, որտեղ դուդուկը հանդես է եկել որպես մենակատար-գերիշխող գործիք: 2014 թվականին խումբը համալրվել է երգիչներով:
«Երաժշտությունը կատարյալ է, երբ այն առաջացնում է հույզեր, զգացմունքներ, որոնք կարող են լինել, թե՛ վիշտ ու տխրություն, թե՛ հրճվանք ու զարմանք և թե՛ խրախճանք: Հայոց պատմությունը և հայ ազգի գենետիկ հիշողությունը պարունակում են իրենց մեջ հույզերի այս ամբողջ գունապնակը: Մեզ մնում է միայն վերարտադրել մեր պապենական ժառանգությունը՝ մեր ժամանակներին հատուկ մոդեռն լուծումներով պահպանելով մեր հազարամյա մշակույթի բյուրեղյա մաքրությունը»
գեղարվեստական ղեկավար՝ Արտակ Ասատրյան:
Գեորգի Մինասյան
դուդուկ, շվի
Դավիթ Ավագյան
թառ
Մարիամ Միրզոյան
ուդ
Գոռ Ղալմուխյան
հարվածային
Էկա Հորստկա
սոպրանո
Արտակ Ասատրյան
սոլո դուդուկ,
գեղարվեստական
ղեկավար